Mu Rwanda abatwite n’abonsa bemerewe gukingirwa

Ikigo cy’igihugu cy’ubuzima mu Rwanda RBC kiratangaza ko abagore batwite ndetse n’abagore bonsa na bo bashobora gufata urukingo rw’icyorezo COVID-19. Ikigo cy’ubuzima kiravuga ko abari muri icyo cyiciro bashobora kwibasirwa n’icyo cyorezo kuruta abandı bagore, kigaheraho kibakangurira gufata urukingo.

Mu bushakashatsi bwakozwe n’ikigo RBC kuva mu gihugu batangiye gukingira icyorezo COVID-19 bugaragaza ko abagore batwite ndetse n’abonsa bashobora gufata urukingo rw’iki cyorezo ntihagire ingaruka bahura na zo. Ibi bisobanurwa na Muganga Sabin Nsanzimana ukuriye ikigo cy’igihugu cy’ubuzima RBC. Avuga ko ubwirinzi bw’umubyeyi utwite bugirira akamaro n’umwana igihe ataravuka.

Abagore batwite n’abonsa baganiriye na radio tv10 kuri iyi ngingo yo gufata urukingo bavuga ko bari basanzwe bafite amakuru ko batemerewe gufata uru rukingo kuko ngo byabagiraho ingaruka. Ababyeyi bitegura bumva aya makuru inzego z’ubuzima zatanze ari ingenzi kuri bo.

Umwe yagize ati <njyewe ndatwite ariko nari narumvise ko utwite atikingiza ,abadukingiye rero byaba ari byiza >

undi nawe ati .”njyewe ndonsa umwana w’umwaka n’amezi umunani ubwo rero numvise ko tutari mubakinirwa ,icyakora babyemeye najyayo ,kuko numviseko turimo kwibasirwa cyane

Dr Nsanzimana ukuriye ikigo cy’igihugu cy’ubuzima RBC anakangurira abagore bonsa ko na bo bemerewe gufata urukingo rw’icyorezo COVID-19 kuko birushaho kubarinda n’abana babo. Aba na bo Muganga Nsanzimana avuga ko batakwiye kugira impungenge kuri uru rukingo.

Ni inkuru nziza ku bagore bonsa. Na bo bavuga ko ari umwanya mwiza wo gufata urukingo rwa COVID-19 mu mugambi wo kwirinda no kurinda abana babo. Uretse kumenya amakuru ko bemerewe kwikingiza icyorezo, nta kirenze kuri ibyo n’igihe bashobora kwikingiriza.

Uretse kuba hatanzwe ubutumwa bukangurira abagore batwite n’abonsa ko na bo bakwihutira gufata inkingo z’icyorezo COVID-19 nta gahunda iratangazwa nk’uko byagiye bibaho ku byiciro bitandukanye byabanje. Ijwi ry’Amerika ntiryabashije kumenya imibare ya nyayo y’abagore batwite n’abagore bonsa bakeneye gukingirwa icyorezo COVID-19.

Imibare ya minisiteri y’ubuzima iragaragaza ko kuva u Rwanda rwatangira gukingira iki cyorezo ababarirwa mu 400,000 bamaze gukingirwa COVID-19.

Leave a Reply

Your email address will not be published.