REG VC irapimisha Covid-19 abakinnyi n’abakozi bitegura kujya mu mikino Nyafurika
Abakinnyi ndetse na Staff yose y’ikipe ya REG Volley Ball Club, batangaje ko bipimisha Covid-19 mbere y’uko bitegura umwiherero wo kujya mu irushanwa ry’amakipe yabaye aya mbere iwayo muri Africa (CAVB) rizabera mu Misiri.
APR VC yo biravugwa ko ishobora gukingiza abakinnyi bayo mbere yo kwerekeza mu Misiri.
Mu ntangiriro z’iki Cyumweru nibwo ubuyobozi bwa Minisiteri ya Siporo mu Rwanda bwahaye uburenganzira amakipe abiri arimo REG Volleyball Club ndetse na APR VC yo gusubukura imyitozo bitewe n’uko bari kwitegura imikino ya CAVB izabera mu Misiri mu ntangiriro za Mata uyu mwaka.
Ubuyobozi bwa REG kuri uyu wa Gatanu tariki 12 Werurwe, bwatangaje ko bupimisha abakozi babwo icyorezo cya Covid-19, basanga nta mukinnyi n’umwe cyangwa umutoza ufite virusi ya Coronavirus, bagahita batangira umwiherero bazakorera muri Hotel ya Hilltop i Remera.
Amakuru agera ku UMUSEKE aravuga ko ikipe ya APR VC na yo iri kwitegura ariya marushanwa kimwe na REG VC, yo ishobora gukingiza abakozi bayo urukingo rwa mbere rwa Covid-19, bagahita bajya mu mwiherero wo gutegura iyi mikino.
REG VC ndetse na APR VC zizitabira irushanwa ry’amakipe yabaye aya mbere iwayo azabera mu Misiri hagati ya tariki 2 Mata ndetse na 11 Mata.
Biteganyijwe ko aya makipe yombi azagera mu Misiri tariki 30 Werurwe bagapimwa Covid-19, bakabona gutomborana n’andi makipe bazahangana
