Tanzania: Amashyaka atavuga rumwe na leta arasaba ko habaho andi matora

Amashyaka abiri akomeye mu yatavuga rumwe n’ubutegetsi muri Tanzania yasabye ko habaho amatora bundi bushya, avuga ko atemera ibyavuye mu matora yo ku wa gatatu w’icyumweru cyashizw, avuga ko yabayemo uburiganya.

Mu kiganiro n’abanyamakuru tariki ya 31 Ukwakira 2020, ishyaka ’Chama cha Demokrasia na Maendeleo’ (CHADEMA) na ACT-Wazalendo yakoreshereje hamwe, yanahamagariye abayashyigikiye kwitabira imyigaragambyo ku wa mbere.

Perezida John Magufuli wari usanzwe ari ku butegetsi ni we watangajwe ko yatsinze amatora n’amajwi 84%.

Ishyaka CHADEMA rivuga ko udusanduku tw’amatora twakozwemo uburiganya ndetse indorerezi zaryo zikangirwa kwinjira mu biro by’amatora.

Freeman Mbowe, umukuru w’ishyaka CHADEMA, yagize ati: “Icya mbere dusaba ni uko habaho andi matora vuba aha hashoboka”.

“Turasaba ko habaho imyigaragambyo ihoraho, yo mu mahoro mu gihugu hose kugeza ibyo dusaba byubahirijwe”.

Uyu mukuru wa CHADEMA yavuze ko ashaka ko akanama k’amatora muri Tanzania n’ako mu birwa bya Zanzibar twombi duseswa kubera ibyo avuga ko ari inenge zagaragaye mu matora.
Zitto Kabwe ukuriye ishyaka ACT-Wazalendo yavuze ko icyo cyemezo aya mashyaka yombi yafashe ari ku neza y”ejo hazaza h’igihugu cyacu”.

Yongeyeho ati: “Ntabwo dushobora kwemera gusubira mu gihe cy’ubutegetsi bw’ishyaka rimwe”.

CHADEMA na ACT-Wazalendo yavuze ko ashaka ko hashyirwaho utunama tubiri twigenga tw’amatora tuzayobora ayo matora yandi.

Tundu Lissu – wari umukandida wa CHADEMA akaba ari uw’ingenzi mu bari bahatanye na Bwana Magufuli – yagize amajwi 13%, nkuko bivugwa n’akanama k’amatora.

Yavuze ko azaba ari ku murongo w’imbere mu bigaragambya.

Kuwa kane, yavuze ko aya “atari amatora ugendeye ku mategeko ya Tanzania n’amategeko mpuzamahanga”.

Ati: “Cyabaye gusa igico cy’abantu bagize gutya bafata icyemezo cyo gukoresha nabi ububasha bwa leta kugira ngo bagundire ubutegetsi”.

Semistocles Kaijage ukuriye akanama k’amatora, yahakanye ibyo birego by’uburiganya. Yavuze ko ibirego by’impapuro mpimbano z’itora nta shingiro bifite.

Hagati aho, indorerezi z’umuryango wa Afurika y’uburasirazuba (EAC) ziyobowe na Sylvestre Ntibantunganya wahoze ari Perezida w’u Burundi zashyigikiye imigendekere y’amatora, zivuga ko “yakozwe mu buryo busanzwe”.

Izi ndorerezi za EAC zasabye ko abafite ibibazo ku migendekere y’amatora babicyemura binyuze mu nzira y’amategeko.

Ariko ambasade ya Leta Zunze Ubumwe za Amerika i Dar es Salaam yavuze ko ibirego by’abatavuga rumwe n’ubutegetsi ari ibyo kwizerwa.

Ambasade ya Amerika yavuze ko “inenge n’ikinyuranyo kinini cyane cy’intsinzi biteye amakenga k’ukwizerwa kw’ibyavuye mu matora… ndetse n’impungenge ku muhate wa leta ya Tanzania wo gukurikiza indangagaciro [amahame] za demokarasi”.

Magufuli ari ku butegetsi kuva mu mwaka wa 2015, ariko ishyaka rye rya CCM ryo riri ku butegetsi kuva ryashingwa mu mwaka wa 1977.

CCM yabayeho ikurikira ishyaka ’Tanganyika African National Union’, ryategetse Tanzania kuva mu mwaka wa 1961 kugeza mu 1977.

Leave a Reply

Your email address will not be published.