Twitter yaburiye Trump ku butumwa yatangaje ko adashobora kwandura Coronavirus kubera ko yayikize
Twitter yatanze umuburo ku butumwa Perezida Donald Trump yanditse kuri uru rubuga nkoranyambaga, ko umubiri we wubatse ubudahangarwa kuri Covid-19 nyuma y’uko abaganga bari bamaze kwemeza ko yayikize, bakamwemerera gusubukura imirimo ye nk’uko bisanzwe.
Mu butumwa Trump yanditse kuri Twitter kuri iki Cyumweru, yagize ati “Abaganga ejo basoje akazi muri White House. Bivuze ko ntashobora kuyandura (ubudahangarwa) cyangwa kuyanduza. Ni byiza kubimenya !!!”
Mu kiganiro na Fox News, Trump yongeye kuzamura ingingo y’ubudahangarwa kuri Coronavirus, avuga ko umubiri we wubatse ubudahangarwa “bushobora kuba ubw’igihe kirekire, kuba ubw’igihe gito cyangwa bw’ubuzima bwe bwose.”
Kugeza ubu nta bimenyetso biremeza ko iyo umuntu yanduye coronavirus akayikira, umubiri we wubaka ubudahangarwa ku buryo adashobora kongera kuyandura, nk’uko byatangajwe n’Ikigo cya Amerika gishinzwe gukumira no kurwanya ibyorezo, CDC.
Iki kigo gikangurira abantu kurushaho kwirinda, ntibatekereze ko bafite ubudahangarwa kuri COVID-19.
Ubutumwa Twitter yashyize kuri tweet ya Trump buvuga ko “yarenze ku mabwiriza ya Twitter ku ikwirakwizwa ry’amakuru ashobora kuyobya abantu cyangwa adakwiriye kuri Covid-19.”
Ubwo butumwa kandi Trump yabushyize kuri konti ye ya Facebook, gusa ho ntabwo burashyirwaho ikirango kiburira abantu, nubwo nayo ivuga ko yahagurukiye amakuru y’ibihuha akwirakwizwa kuri COVID-19.
Ku wa Kabiri w’icyumweru gishize, Facebook yasibye ubutumwa bwa Trump bwavugaga ko ibicurane bishobora kuba igikatu kurusha Covid-19.
Si ubwa mbere ubutumwa bwa Trump bushyirwaho ikirango kiburira abantu, kuko no mu kwezi gushize byabaye ku bwagarukaga ku matora, ko abantu bashobora kuzajya batora kabiri, n’ubundi bwavugaga ko ibicurane byo mu bukonje bishobora guhitana abantu benshi kurusha Covid-19.
